ന്യൂഡൽഹി:ബിൽക്കിസ് ബാനു കേസിൽ ഗുജറാത്ത് സർക്കാരിന് തിരിച്ചടി. കേസിലെ 11 പ്രതികളുടെയും ശിക്ഷായിളവ് സുപ്രീം കോടതി റദ്ദാക്കി. ശിക്ഷായിളവ് റദ്ദാക്കിയ സാഹചര്യത്തിൽ 11 പ്രതികളും വീണ്ടും ജയിലിലേക്ക് പോകും. പ്രതികളെ വിട്ടയയ്ക്കാനുള്ള ഗുജറാത്ത് സർക്കാരിന്റെ ഉത്തരവാണ് സുപ്രീം കോടതി റദ്ദാക്കിയത്. പ്രതികളെ വിട്ടയക്കാൻ ഗുജറാത്ത് സർക്കാരിന് അവകാശമില്ലെന്ന് സുപ്രീം കോടതി പറഞ്ഞു. ജസ്റ്റിസ് ബി വി നാഗരത്ന അധ്യക്ഷയായ സുപ്രീം കോടതി ബെഞ്ചാണ് വിധി പുറപ്പെടുവിച്ചത്. വാദം കേൾക്കുന്നതിനിടെ ഗുജറാത്ത് സർക്കാരിനെ സുപ്രീം കോടതി അതിരൂക്ഷമായി വിമർശിച്ചു. ഗുജറാത്ത് സർക്കാരിന്റെ ഉത്തരവ് നിയമപരമല്ലെന്നും കോടതി പറഞ്ഞു.
“ഗുജറാത്ത് സർക്കാരിൻ്റെ ഉത്തരവ് നിയമപരമല്ല. നിയമം അനുസരിച്ച് എടുക്കേണ്ട തിരുമാനം അല്ല ഗുജറാത്ത് സർക്കാരിൽ നിന്ന് ഉണ്ടായത്. അധികാരം ഇല്ലാത്ത അധികാരിയാണ് ഉത്തരവ് ഇറക്കിയത്” എന്നും പറഞ്ഞ കോടതി സർക്കാരിനെ രൂക്ഷമായി വിമർശിച്ചു. മഹാരാഷ്ട്ര സർക്കാരിൻ്റെ അധികാരത്തെ ഗുജറാത്ത് സർക്കാർ മറികടന്നു. മഹാരാഷ്ട്രയുടെ അധികാരം ഗുജറാത്ത് സർക്കാർ തട്ടിയെടുത്തുവെന്നും കോടതി വിമർശിച്ചു. ജസ്വന്ത് നായി, ഗോവിന്ദ് നായ്, ശൈലേഷ് ഭട്ട്, രാധ്യേഷം ഷാ, ബിപിൻ ചന്ദ്ര ജോഷി, കേസർഭായ് വൊഹാനിയ, പ്രദീപ് മോർധിയ, ബകാഭായ് വോഹാനിയ, രാജുഭായ് സോണി, മിതേഷ് ഭട്ട്, രമേഷ് ചന്ദന എന്നിവരാണ് മോചിപ്പിക്കപ്പെട്ട 11 പ്രതികൾ. 2022 ഓഗസ്റ്റ് 15ന്, 15 വർഷത്തെ ജയിൽവാസം പൂർത്തിയാക്കിയതിനാൽ, അവരുടെ പ്രായവും തടവുകാലത്തെ പെരുമാറ്റവും പരിഗണിച്ച് അവരെ വിട്ടയയ്ക്കുകയായിരുന്നു.
കേസിൽ ജീവപര്യന്തം തടവിന് ശിക്ഷിക്കപ്പെട്ട 11 പേരെ മോചിപ്പിക്കാനുള്ള ഗുജറാത്ത് സർക്കാരിന്റെ തീരുമാനത്തെ ചോദ്യം ചെയ്ത് ബിൽക്കിസ് ബാനുവും സിപിഎം നേതാവ് സുഭാഷിണി അലിയും ടിഎംസി നേതാവ് മഹുവ മൊയ്ത്രയും അടക്കം സമർപ്പിച്ച ഹർജികളിലാണ് കോടതിയുടെ വിധി. ബിൽക്കിസ് ബാനു കേസിലെ കുറ്റവാളികൾ ഒരുതരത്തിലുമുള്ള ദയയും അർഹിക്കുന്നില്ലെന്നും, ജയിലിലേക്ക് തിരികെ അയയ്ക്കണമെന്നും ബിൽക്കിസിന്റെ അഭിഭാഷക ശോഭ ഗുപ്ത സുപ്രീം കോടതിയിൽ ആവശ്യപ്പെട്ടിരുന്നു . അത്യന്തം പ്രാകൃതമായ രീതിയിലായിരുന്നു പ്രതികളുടെ കൊടുംക്രൂരതകൾ. എന്നിട്ടും കുറ്റവാളികളോട് മൃദു നിലപാട് ഗുജറാത്ത് സർക്കാർ സ്വീകരിച്ചു. അവർക്ക് അനുകൂലമായി നിലപാടെടുത്തു. ശിക്ഷാ കാലയളവിലെ ഭൂരിഭാഗം ദിവസവും പ്രതികൾ പരോളിൽ പുറത്തായിരുന്നു. കേസിലെ 11 കുറ്റവാളികളെ ശിക്ഷായിളവ് നൽകി മോചിപ്പിച്ച ഗുജറാത്ത് സർക്കാരിന്റെ നടപടിക്കെതിരെ സമർപ്പിച്ച ഹർജികളിൽ വാദം കേൾക്കവെയാണ് അഭിഭാഷക ഇക്കാര്യങ്ങൾ അറിയിച്ചത്.
ദേവ്ഗഡ് ബാരിയ ടൗണിൽ താമസിക്കുന്ന കേസിലെ സാക്ഷികളിലൊരാളായ അബ്ദുൾ റസാഖ് മൻസൂരി പറഞ്ഞു, “ഗുജറാത്ത് സർക്കാരിന്റെ തീരുമാനം സുപ്രീം കോടതി റദ്ദാക്കുകയും പ്രതികളോട് കീഴടങ്ങാൻ ആവശ്യപ്പെടുകയും ചെയ്തതിൽ സന്തോഷമുണ്ട്. ഞങ്ങൾക്ക് ഇന്ന് നീതി ലഭിച്ചതായി എനിക്ക് തോന്നുന്നു,” അബ്ദുൾ പറഞ്ഞു. നിലവിൽ ദേവഗഡ് ബാരിയ ടൗണിൽ താമസിക്കുന്ന കേസിലെ സാക്ഷികളിലൊരാളായ റസാഖ് മൻസൂരി മാധ്യമപ്രവർത്തകരോട് പറഞ്ഞു.
ബിൽക്കിസ് ബാനു കേസ്
മാർച്ച് 3, 2002: രൺധിക്പൂർ ഗ്രാമത്തിൽ 21 കാരിയായ ബിൽക്കിസ് ബാനോയുടെ കുടുംബത്തെ അക്രമാസക്തരായ ജനക്കൂട്ടം ആക്രമിക്കുകയും അവളെ കൂട്ടബലാത്സംഗം ചെയ്യുകയും ഏഴ് കുടുംബാംഗങ്ങളെ കൊലപ്പെടുത്തുകയും ചെയ്തു.
ഡിസംബർ 2003: ബിൽക്കിസ് ബാനോ കേസിൽ സിബിഐ അന്വേഷണത്തിന് സുപ്രീം കോടതി ഉത്തരവിട്ടു.
2008 ജനുവരി 21: ബലാത്സംഗത്തിനും കൊലപാതകത്തിനും പ്രത്യേക കോടതി 11 പേരെ ജീവപര്യന്തം തടവിന് ശിക്ഷിച്ചു.
ഡിസംബർ 2016: 11 കുറ്റവാളികളുടെ അപ്പീലുകളിൽ ബോംബെ ഹൈക്കോടതി വിധി മാറ്റിവെച്ചു.
മെയ് 2017: ബോംബെ ഹൈക്കോടതി 11 കുറ്റവാളികളുടെ ജീവപര്യന്തം ശരിവച്ചു.
ഏപ്രിൽ 23, 2019: ബിൽക്കിസ് ബാനുവിന് 50 ലക്ഷം രൂപ നഷ്ടപരിഹാരം നൽകാൻ ഗുജറാത്ത് സർക്കാരിനോട് സുപ്രീം കോടതി നിർദ്ദേശിച്ചു .
മെയ് 13, 2022: ഗുജറാത്ത് സർക്കാരിന്റെ 1992-ലെ നയം അനുസരിച്ച് അകാല മോചനത്തിനുള്ള കുറ്റവാളിയുടെ ഹർജി പരിഗണിക്കാൻ സുപ്രീം കോടതി നിർദ്ദേശിച്ചു.
ഓഗസ്റ്റ് 15, 2022: ഗുജറാത്തിന്റെ റിമിഷൻ പോളിസി പ്രകാരം 11 കുറ്റവാളികളെ ഗോധ്ര സബ് ജയിലിൽ നിന്ന് മോചിപ്പിച്ചു.
2022 ഓഗസ്റ്റ് 25: കുറ്റവാളികളുടെ അകാല മോചനത്തിനെതിരായ പൊതുതാൽപര്യ ഹർജിയിൽ സുപ്രീം കോടതി നോട്ടീസ് അയച്ചു.
നവംബർ 30, 2022: ഗുജറാത്തിന്റെ ഇളവ് തീരുമാനത്തെ ബിൽക്കിസ് ബാനോ വെല്ലുവിളിച്ചു.
ഡിസംബർ 17, 2022: 2022 മെയ് 13ലെ വിധി പുനഃപരിശോധിക്കണമെന്ന ബിൽക്കിസ് ബാനോയുടെ അപേക്ഷ സുപ്രീം കോടതി തള്ളി.
2023 മാർച്ച് 27: ഇളവിനെതിരായ ബിൽക്കിസ് ബാനോയുടെ ഹർജിയിൽ സുപ്രീം കോടതി നോട്ടീസ് അയച്ചു.
ഓഗസ്റ്റ് 7, 2023: ഇളവ് തീരുമാനത്തെ ചോദ്യം ചെയ്യുന്ന ഹർജികളിൽ സുപ്രീം കോടതി അന്തിമ വാദം ആരംഭിച്ചു.
ഒക്ടോബർ 12, 2023: 11 ദിവസത്തെ വാദത്തിന് ശേഷം വിധി പറയാൻ സുപ്രീം കോടതി മാറ്റിവെച്ചു.
ജനുവരി 8, 2024: “സ്റ്റീരിയോടൈപ്പ്” ഉത്തരവുകൾ ഉദ്ധരിച്ച് 11 കുറ്റവാളികളുടെ ഇളവ് എസ്സി അസാധുവാക്കി, രണ്ടാഴ്ചയ്ക്കുള്ളിൽ കീഴടങ്ങാൻ കുറ്റവാളികളോട് നിർദ്ദേശിക്കുന്നു.
