കൊല്ക്കത്ത : വനിതാ ഉദ്യോഗസ്ഥയോട് മോശമായി പെരുമാറിയ വീഡിയോ പുറത്തുവന്നതിന് പിന്നാലെ രാജിവെച്ച് തൃണമൂല് കോണ്ഗ്രസ് മന്ത്രി.പാർട്ടിയിലെ മുതിർന്ന നേതാവും സംസ്ഥാന ജയില് മന്ത്രിയുമായ അഖില് ഗിരിയാണ് രാജിവെച്ചത്. ഉദ്യോഗസ്ഥയെ അപമാനിക്കുന്ന വീഡിയോ പുറത്തുവന്നതിന് പിന്നാലെ മന്ത്രിക്ക് പാർട്ടിയില് നിന്നുള്പ്പെടെ കടുത്ത വിമർശനം നേരിടേണ്ടി വന്നിരുന്നു. സമ്മർദ്ദം ശക്തമായതോടെ പാർട്ടി രാജിവെയ്ക്കാൻ ആവശ്യപ്പെടുകയായിരുന്നു. ഇതിന് പിന്നാലെയാണ് അഖില് ഗിരി മന്ത്രിസ്ഥാനം രാജിവെച്ചത്.
ജില്ലാ വനംവകുപ്പ് ഓഫീസർ മനീഷ ഷായെ, മന്ത്രി ഭീഷണിപ്പെടുത്തുന്ന വീഡിയോയാണ് സമൂഹമാദ്ധ്യമങ്ങളില് വൈറലായത്. ‘ ഈ വിഷയത്തില് ഇടപെട്ടാല് നീ തിരിച്ച് വരില്ലെന്ന് ഉറപ്പുവരുത്തും. നന്നായി സംസാരിച്ചില്ലെങ്കില് ഞാൻ സ്വയം വടിയെടുത്ത് നിന്നെ അടിക്കും’ എന്നാണ് മന്ത്രി ആക്രോശിച്ചത്.
ഈ വീഡിയോ വൈറലായതോടെ പ്രതിഷേധവുമായി നിരവധി പേരാണ് രംഗത്തെത്തിയത്. മന്ത്രി വനിതാ ഉദ്യോഗസ്ഥയോട് മാപ്പ് പറയണമെന്നും മന്ത്രിസ്ഥാനം രാജിവെയ്ക്കണം എന്നുമുള്ള ആവശ്യങ്ങളും ഉയർന്നു. തുടർന്ന് രാജിവെയ്ക്കാൻ താൻ തയ്യാറാണെന്നും എന്നാല് ഒരിക്കലും മാപ്പ് പറയില്ലെന്നുമാണ് മന്ത്രി പറഞ്ഞത്.വൻ ജനരോഷത്തെ തുടർന്നാണ് പാർട്ടി നടപടി സ്വീകരിച്ചത്. പാർട്ടിയെ പ്രതിനിധീകരിച്ച് സന്ദേശം നൽകുന്നതിന് മുമ്പ് തൃണമൂൽ കോൺഗ്രസ് സംസ്ഥാന അധ്യക്ഷൻ സുബ്രത ബക്ഷി അഖിൽ ഗിരിയുമായി ഇക്കാര്യം സംസാരിച്ചു.
പാർട്ടി വക്താവ് ഡോ. സന്താനു സെൻ പറഞ്ഞു: “ഇന്നലെ ഞങ്ങളുടെ മന്ത്രി ഒരു വനിതാ ഫോറസ്റ്റ് ഓഫീസറോട് മോശമായി പെരുമാറി, അത്തരം പെരുമാറ്റത്തെ ഞങ്ങൾ പിന്തുണയ്ക്കുന്നില്ലെന്ന് ഞങ്ങൾ ഉടൻ തന്നെ വ്യക്തമാക്കി… ഞങ്ങളുടെ വനം മന്ത്രി ബിർബഹ ഹൻസ്ദയും ഉദ്യോഗസ്ഥനുമായി സംസാരിച്ചു. ഇന്ന് നിർദ്ദേശപ്രകാരം പാർട്ടിയുടെ, ഞങ്ങളുടെ സംസ്ഥാന പ്രസിഡൻ്റ് സുബ്രത ബക്ഷി അഖിൽ ഗിരിയുമായി ടെലിഫോണിൽ സംസാരിക്കുകയും ഓഫീസറുടെ മാപ്പ് ചോദിക്കാനും പാർട്ടിക്ക് രാജി അയയ്ക്കാനും നിർദ്ദേശിച്ചു.
“ഇവിടെ ശ്രദ്ധിക്കേണ്ടത് തൃണമൂൽ കോൺഗ്രസ് രാജ് ധർമ്മമാണ് പിന്തുടരുന്നത്, ഒരു പാർട്ടി എന്ന നിലയിൽ തൃണമൂൽ കോൺഗ്രസിന് മാത്രമേ അത്തരം നടപടിയെടുക്കാൻ കഴിയൂ,” അദ്ദേഹം തുടർന്നു .
സ്ത്രീ വിരുദ്ധ ബിജെപിക്ക് ഒരിക്കലും ഇത്തരമൊരു നടപടി സ്വീകരിക്കാൻ കഴിയില്ലെന്നും മുൻകാലങ്ങളിൽ സ്ത്രീവിരുദ്ധ നടപടികളിൽ ഏർപ്പെട്ടിട്ടുള്ള സിപിഎമ്മിന് ഇത്തരം രാജധർമ്മം പിന്തുടരാനാകില്ലെന്നും സെൻ കൂട്ടിച്ചേർത്തു.
‘വനിതാ ഉദ്യോഗസ്ഥയോട് അത്തരത്തില് പെരുമാറിയത് ദൗർഭാഗ്യകരമാണ്. ഞാൻ അത്തരത്തില് സംസാരിച്ചിരുന്നില്ലെങ്കില് പ്രശ്നമാവില്ലായിരുന്നു. അതില് ഞാൻ ഖേദിക്കുന്നു. എന്നാല് ഇതിന്റെ ഏക ഉത്തരവാദി വനിതാ ഉദ്യോഗസ്ഥയാണ് ‘ രാജിവെച്ചതിന് പിന്നാലെ അഖില് ഗിരി പറഞ്ഞു.
മുഖ്യമന്ത്രി മമത ബാനർജി തന്നോട് മാപ്പ് ചോദിക്കാൻ ആവശ്യപ്പെട്ടിട്ടില്ലെന്നും രാജിവെയ്ക്കാൻ മാത്രമാണ് നിർദ്ദേശിച്ചത് എന്നുമാണ് അഖില് ഗിരി മാദ്ധ്യമങ്ങളോട് പറഞ്ഞത്.
